Plantun de Prouvènço

Pèr coumpara dos planto d'encò nostre

Bolboschoenus laticarpus & Morus alba

Triangle(-di-làrgi-fru)

Bolboschoenus laticarpus

Cyperaceae

Àutri noum : Liandro, Triangle.

Noms en français : Scirpe à fruits larges, Souchet à fruits larges.

Descripcioun :
Aquéu triangle dóu gènre Bolboschoenus (planto nousado emé de lòngui fueio) trachis dins li canau, roubino e li limoun de ribiero. Fai gaire qu'es esta destria dóu triangle-marin en raport emé la formo de la grano qu'es eici mai larjo. Subretout vèn pas dins li relarg mounte i'a de sau au contro dóu marin. Lis espigo soun mai longo eici. Èi pu tihous de faire la diferènci emé Bolboschoenus glaucus ; pèr acò fau regarda la formo de la grano e l'espessour de l'"exocarpus" (pu grando eici). Coumpara emé lou triangle-verdau que ié sèmblo proun.

Usanço :
Se pòu gaubeja pèr la banastarié, mai avèn ges d'entresigne precis. Escriéure au site se n'en sabès mai. Li canard e lis auco manjon si boudougno.

Port : Grando erbo
Taio : 1 à 2 m
Fueio : costo paralèlo
Tipe bioulougico : Geoufite
Cicle bioulougico : Planto renadivo

Gènre : Bolboschoenus
Famiho : Cyperaceae

Ordre : Poales

Coulour de la flour : Brunello
Petalo : ges
Ø (o loungour) enflourejado : 1 à 4 cm
Flourido : Printèms - Estiéu

Sòu : Ca
Autour basso e auto : 0 à 900 m
Aparado : Noun
Mai à setèmbre

Liò : Ribiero - Roubino - Canau
Estànci : Termoumediterran à Mesoumediterran
Couroulougi : Paleousubretroupicalo
Ref. sc. : Bolboschoenus laticarpus Marhold, Hroudová, Duchácek & Zákr

Amourié-blanc

Morus alba

Moraceae

Àutri noum : Amourié, Amouhié, Amourié-rose.

Nom en français : Mûrier blanc.

Descripcioun :
L'amourié-blanc se rescontre encaro d'eici, d'eila, dins li colo e la campagno. S'èi naturalisa dins la valado dóu Rose. Se recounèis à si fueio óuvalo, en cor à la baso, e dentado. Se pòu vèire de varieta roso que ié dison amourié-rose (fotò).

Usanço :
Se saup que l'amourié, que nous vèn d'Asìo dóu couchant, fuguè proun cultiva pèr abali, emé si fueio, li magnan. Aquéli d'aqui manjon rèn qu'acò. Lou fru de l'amourié-blanc se manjo pas gaire au nostre, au contro de l'amourié-negre. Li fueio soun vertuouso pèr ajuda à digeri e dourmi, pèr lucha contro li fèbre e coume remaisso doulour.